PABLO

 

PABLO

Mar Z. Holanda

I

Saulo ang una niyang pangalan

Sa Tarso, lalawigan ng Cilicia siya'y isinilang

"Relehiyosong Terorista" ang bansag ng karamihan

Naging "Apostol sa Biyaya ng Diyos" kalaunan

II

Saksi ang kamusmusan sa kaniyang pananampalataya

Buhat sa mga magulang na sa utos ng ninuno'y tumatalima

Sa Paniniwalang Hudio siya'y may masigasig na paniniwala

Kung para sa kalooban ng Diyos, ang katapanga'y sintayog ng tala.

III

Isang abogado, miyembro ng pinakamataas na hukumang Hudio,

Naging tagausig ng mga Kristiyano

Dumadakip sa mga nakikinig ng ebanghelyo

Maging babae't lalaking kaanib sa Daan ng Panginoong Hesu-Kristo

IV

Sa kaniyang pagyaon patungo sa Damasco

Tangan ang pahintulot mula sa pinakapunong paring Hudio

Nakasisilaw na liwanag ang sa daan ay kumislap

Na nagdulot sa kaniyang agad na pagdaplak

V

Biglang nagsalita sa kaniya ang isang tinig:

"Saulo!, Saulo! bakit mo ako inuusig?"

Sa kaniyang pagtatanong tumugon ang tinig

"Ako si Hesus, ang iyong inuusig."

VI

Siya'y pinatayo ng tinig ng Panginoon

Noo'y sinabihan siyang sa bahay ni Hudas muna tumuloy

Ang kaniyang mga dapat gawi'y doon din sasabihing tuloy-tuloy

Kaya ang bulag na si Saulo'y inakay ng mga kasama't sa Damasco'y nagpatuloy

VII

Sa pamamagitan ni Ananias, na isinugo ni Bathala

Si Saulo'y napuspos ng Espiritu't, muling nakakita

Siya'y nagpabautismo't nagsimula nang magpala

Nangaral at nagpalaganap ng Mabuting Balita

VIII

Sa Arabia, Damasco, Jerusalem at iba pa,

Sa iba't ibang lupain "Si Hesus ang anak ng Diyos", kaniyang wika

Habang ginugugol sa Hentil ang panahon niya

Mula Saulo'y tinawag siyang Pablong kaaba-aba

IX

Walang duda

Si Pablo'y nagbalik-loob na

Si Hesus na dati'y kaniyang tinutuligsa

Sa kalooban ng Diyos'y nagpapahayag nang mga salita.

X

"Sapagkat para sa akin,

ang buhay ay para kay Cristo at ang kamatayan ay pakinabang"

"Hindi na ako ang nabubuhay ngayon

Kundi si Kristo na ang nabubuhay sa akin"

XI

Sa huling pahina ng kaniyang buhay

Nagsimula man siyang tila kandilang patay

Ang ningas naman nito'y hindi humumpay

Nang ang liwanag ni Hesus sa kaniya'y gumabay.

XI

"Sapagkat dumating na ang panahon ng pagpanaw ko...,

Ako ay mistulang isang handog sa templo...

Ang aking pakikipaglaban ay pinagbuti ko...

Ang mga dapat na takbuhin ay natapos ko...

At sa tapat na pananampalataya'y nanatili ako"

XII

"Kaya naghihintay ako ng koronang gantimpala

Para sa mga namuhay ayon sa kaloob ni Bathala

Siya ang magpuputong sa akin ng koronang biyaya

Maging sa lahat ng naghihintay sa Kaniya sa dambana."

XIII

Wala man sa mga tala kung paano siya humimlay

Sa kaniyang mga salita siya'y binubuhay

Apostol na tanyag, kababaang-loob ay taglay

Haligi ng Simbahang tatatak habambuhay.

Inilimbag noong 28 Hunyo 2020
Ni Mar Z. Holanda https://sites.google.com/view/marlikhain/home/pablo?authuser=0